لە بەیاننامەیەکدا، مەکتەبی سیاسی حزبی شیوعی عێراق،بەزاندنی سەروەریی نیشتمانی بە مەترسیدار ناودەبات و بە پێویستی دەزانێت ڕاستییەکان بۆ ڕای گشتی ئاشکرا بکرێن.
داواش لە ئەنجومەنی نوێنەران دەکات لەبری بانگهێشتکردنی ڕووکەشانەی بەرپرسان، لێپێچینەوەیەکی شەفاف و ڕاستەقینە لەگەڵ سەرکردە باڵا ئەمنییەکان دەست پێ بکات
🔺ناوەڕۆکی بەیاننامەکە
ئاشکرابوونی هەواڵی بوونی بنکەیەکی نهێنیی ئیسرائیل لە ناو خاکی عێراق و بەکارهێنانی بۆ ئۆپەراسیۆنی سەربازی دژ بە ئێران، پێشێلکارییەکی زەقی سەروەریی عێراق و هەڕەشەیەکی جیددییە بۆ سەر ئاسایشی نیشتمانی، ئەمە بێدەنگییەکی وەها هەڵناگرێت کە پاساوی بۆ بهێنرێتەوە.
جێگەی سەرنج و تێڕامانە کە حکومەتی عێراق لە مانگی ئازاری ڕابردووەوە ئەم بابەتەی پەردەپۆش کردووە و دواتریش نکۆڵی لێکردووە، ئێستاش سەرەڕای ئاشکرابوونی ڕاستییەکان، هێشتا لەسەر بێدەنگی و شاردنەوەی زانیارییەکان بەردەوامە.
ئێمە حکومەتی فیدراڵ بە بەرپرسیاری یەکەمی ئەم خرقە ئەمنییە دەزانین و داوای لێدەکەین بە ڕاشکاوی وەڵامی گومانی هاووڵاتییان بداتەوە. لێرەدا پرسیارێکی جەوهەری دەڕەخسێت: ئەگەر عێراق خاوەنی پتر لە ملیۆنێک و نیو کارمەندی ئەمنییە (لە سوپا، پۆلیس، هەواڵگری و حەشد)، چۆن ڕێگە دراوە پێشێلکارییەکی لەم شێوەیە ڕوو بدات؟ هەروەها، بۆچی تا ئێستا ئەنجامی لێکۆڵینەوەکانی بۆردومانەکەی ٤ی ئازار، کە بووە هۆی شەهیدبوونی سەربازێکی عێراقی، بۆ خەڵک ڕانەگەیەندراوە؟
داوا لە ئەنجومەنی نوێنەران دەکەین، لەبری بانگهێشتکردنی ڕووکەشانەی بەرپرسان، لێپێچینەوەیەکی شەفاف و ڕاستەقینە لەگەڵ سەرکردە باڵا ئەمنییەکان دەست پێ بکات. پێویستە بەرپرسیارێتییەکان دیاری بکرێن و بڕیاری ئەمنی یەکبخرێت بۆ ئەوەی ڕێگری لە دووبارەبوونەوەی کارەساتی لەو شێوەیە بکرێت.
لە کۆتاییدا، جارێکی تر جەخت لە هەڵوێستی نەگۆڕمان دەکەینەوە: بوونی هەر هێزێکی بیانی لەسەر خاکی عێراق ڕەتکراوەیە. بەکارهێنانی خاک و ئاسمانی وڵات بۆ هێرشکردنە سەر دراوسێکان، تەنها دەبێتە هۆی پەلکێشکردنی عێراق بۆ ناو ململانێیەکی خوێناوی کە گەلەکەمان هیچ بەرژەوەندییەکی تێدا نییە.
