هۆشیاری عەبدولعەزیز 

 یەكێك لە هۆكارە هەرە كاریگەرەكانی داڕووخانی كۆمەڵگا و تێكچوونی شیرازەی كۆمەڵایەتی و نەمانی ئینتيمای نیشتمانی، بێئومێدیيە لە دەسەڵات و پرۆسەی حوكمڕانی و ئەو ستراكچەرانەی كە پایەكانی دەوڵەت ڕادەگرن، لە زۆر لە كۆمەڵگا دواكەوتوو داسەپاوەكاندا دەسەڵات لە پرۆسەی بەردەوامی خۆیدا و لە دەرئەنجامی ئیحتكاركردنی جومگە گرنگەكانی ئیدارەدانی دەوڵەتدا دەبێتە هۆكاری دروستبوونی حاڵەتێكی مەترسیداری دەروونی وا، كە مرۆڤ لە بازنەی سیاسەتی ئەو دەسەڵاتەدا توشی جۆرێك لە داڕمانی قووڵی دەروونی دەبێت و ناتوانێ بەشێوەیەكی كرداری داكۆكی لە بەها كۆمەڵایەتی و نەتەوەیی و نیشتمانییەكان و پێشێلكردنی ماف و داخوازیيە ڕەواكانی خۆی و كۆمەڵگا بكات، كە كراونەتە قوربانی بەرژەوەنديیە تایبەتەكانی حزب و جەمسەرە دەسەڵاتدارەكان.

 زۆرجار ئەم جەمسەرانە كە لە پرۆسەی ئیدارەدانی كۆمەڵگادا خاوەن پایەی بەهێز و بڕیاردەرن، دەبنە هۆكاری دروستكردنی بۆشایيەكی گەورە لە نێوان خەڵك و دەسەڵاتدا و هەوڵدەدەن لەو ڕێگایەوە  چاوەڕوانی جەماوەر و بێباكی و بێخەمی دەسەڵات دروستبكەن، كە لە ڕووكاری یەكەمدا قازانجەكەی بۆخۆیانە و لە پشتیشەوە حزب و بنەماڵە دەبنە ئامێری ئاراستەكردن و جووڵاندنی خەڵك تا ئەو ئاستەی كە جۆرێك لە نائومێدی چێدەبێ و بەدروستبوونی نائومێدیش دەسەڵات بۆخودی خۆی دەبێتە خاوەنی سەرەتا و كۆتايی پرۆسەی حوكمڕانی و كەس ئومێدی بەگۆڕانكاری و هیچ جۆرە چاكسازیيەك نامێنێ و ڕاستەوخۆ دەبێتە گرێیەكی دەروونی مەترسیدار و كاردەكاتە سەر تێكدانی شیرازەی كۆمەڵایەتی و خوڵقاندنی دەیان جۆر لە قەیران و تەنگوچەڵەمەی ئابووری و ژیاری كۆمەڵگا و دەبێتە هۆكاری دروستكردنی بۆشاییەكی گەورە لەنێوان خەڵك و دەسەڵاتدا، ئەم بۆشایيەش هێندەی تر كاریگەری دەكاتە سەر جۆری بیركردنەوە و تێڕامانی خەڵك لە سیاسەت و حوكمڕانی و بێئومێدی بەتەواوەتی باڵدەكێشێت بەسەر كۆمەڵگادا و ئاشتی كۆمەڵایەتی دەخاتە ژێر پرسیارەوە بەوەی كە ئایە لەو دۆخە بێئومێدیيەدا كاردانەوەكان چی دەبن و تاك دەكەوێتە كوێی ئەو بۆشایيەوە كە لە نێوان پرۆسەی ئیدارەدانی كۆمەڵگا و خەڵكدا دێتە بەرهەم و كەی ئاراستە ڕاستەقینەكەی سیاسەت و دەسەڵاتدارێتی دادپەروەرانە دەدۆزرێتەوە كە بنەمایەكی بەهێزە لە ڕاگرتنی باڵانسی گشتی كۆمەڵگادا، هەرچەندە ئەم پرۆسەیە لە وڵاتانی رۆژهەڵاتی ناوەراست و بەدەستی كۆمەڵێك دەسەڵاتداری مافیای فاشیل و ستەمکارەوە بووەتە هۆکاری شکاندنی كەرامەتی مرۆڤ و وای کردووە مرۆڤبوون هیچ جۆرە ئەرزشێكی نیيە و نەبووەتە بابەتێکی کاریگەر لە نێو پانتايی دونیای سیاسیدا، هەرچەندە شێواوی بارودۆخی كۆمەڵگا و ململانێ و كێشمەكێشە سیاسی و ئابووریيەكان بەدەستی گرووپگەلێکی چەتەی دەسەڵاتداری مافیای فاشیل و ستەمکارەوە بووەتە مەترسی بەسەر کۆی کایەی گشتییەوە، پەیوەستە بە سیستەمی سەرمایەداری و ئەو قەیران و تەنگوچەڵەمانەوە كە ئەم سێستەمە بەرهەمهێنەرێتی، بووەتە هۆی زیاتر گەشەكردنی هەژاری‌ و بێكاری و كوێرەوەی كۆمەڵگای مرۆڤایەتی و ئامرازێكی باشیشە بۆ ڕەواجدان بە نەزانی ‌و خورافە و دواكەوتوویی كۆمەڵگا و چەواشەكردنی خەڵك و برەودان بە كەلتووری ژێردەستەيی و تێكدانی دۆخی سیاسی و ئابووری، كە دەسەڵات ڕاستەوخۆ لێی بەرپرسیارە و دەیەوێ‌ بەو گەمژەيی و بێئومێدیيە كەس بیری لای گۆڕانكاری و لەگۆڕنانی ئەو سێستەم و دەسەڵاتە نەبێ، كە سەرچاوەی هەژاری ‌و برسێتی، بێكاری ‌كۆمەڵگایە و بووەتە مایەی بەرهەمهێنانی سەدان جۆر قەیران و كێشمەكێشی جیاجیا .

ئەم پرۆسە مەترسیدارە كە پشت ئەستوورە بە پڕۆژە و نەخشەی سیاسی و ئابووری نیولیبرالیزم و سيستەمی سەرمایەداری وایكردووە كۆمەڵگای عێراقی و بەتایبەت كوردستان بكەوێتە بەر پەلامارێكی مەترسیداری ڕووتاندنەوەی خەڵك و تێكدانی شیرازەی كۆمەڵایەتی و شێواندنی بازاڕ و هەموو ئەو بەهایانەی كە لە دۆخی ئاسایيدا خزمەت بە خودی هاووڵاتی دەكەن،  لەكاتێكدا خۆشیان باش دەزانن كە دەسەڵات بەرپرسیارە لەدروستكردنی خۆشگوزەرانی هاووڵاتیيان و فەراهەمكردنی دۆخێكی گونجاو بۆ ژیان و ناكرێ بێ ئومێدی ببێتە شوێنگرەوەی راگرتنی ئەو هاوسەنگیيەی كە لە ژینگەی سیاسی و ئابووری كۆمەڵگادا پێویستە و میكانیزمی بەرجەستەكردنی خۆشگوزەرانی خەڵكە، چونكە ئەگەر دیقەت بدەین دەبینین یەكێك لە درووشمە سەرەكیيەكانی بانگەشەكانی زۆرینەی ئەحزابی سیاسی لە پرۆسەی هەڵبژاردن و كاری ڕێكخراوەيیدا، دەستەبەركردنی خۆشگوزەرانی و خزمەتی خەڵكە و بەردەوامیش لەو ڕێگایەوە گرەو لەسەر سەركەوتنیان دەكەن و هەوڵدەدەن بەو ئاراستەیە متمانەی دەنگدەر و جەماوەر بەدەستبێنن، كەچی پێچەوانە بەو بانگەشە و هاتوهاوارە، ئەحزابی حوكمڕانی ئەم كۆمەڵگایە بێ جیاوازی زمان و كلتوور و ڕەگەز و ئایين، هەڵگری یەك عەقڵیەتی دەوڵەتدارین و بێشەرمانە و بەدوور لە هەموو بەهایەكی ئەخلاقی، كۆمەڵگا دەگەمژێنن و گرەو لەسەر ساختەچێتی و پێچ و پەنا دەكەن و بوونەتە مۆرانەی كلۆركردنی پرۆسەی دیموكراسی و هەڵبژاردن و ئەیانەوێت ئیرادە و شكۆی هاووڵاتی و كۆمەڵگا بەیەكجاری بشكێنن و تەواوی خەڵك كۆیلە و بەردەی ژێردەستی ئەوان بێت و نەتوانێ هیچ هەنگاوێكی جیاواز بهاوێ لەپێناو گۆڕانكاری ڕیشەيیدا.

 ئەم جۆرە دەسەڵاتە كە لە مناڵدانی  نیولیبرالیزمدا گەشەی كردووە و گەورەبووە، لە یەكەمین هەنگاوی پرۆسەی حوكمڕانیدا كار لەسەر بێبەهاكردنی ئینسان دەكات و هەموو جۆرە ڕەخنە و هەوڵێك بەئاراستەی دروستكردنی فەزایەكی تر ڕەتدەكاتەوە و دەبێتە ڤایرۆسی ژیان و قێزەوەنترین جۆری بێئومێدی بەرجەستە دەكات و كۆمەڵگا دەكاتە كۆمەڵگایەكی مشەخۆری بێ مۆراڵ و هیچ بەهایەك نامێنێتەوە مرۆڤ لە پێناو گۆڕانكاری دەستی بۆبەرێت. واتا لەم جۆرە سیستەمەدا كە نەوەیەك لە كەپیتاڵیزم و نیولیبرلیزمی جیهانی بەڕێوەیدەبات، ئەوەندەی كار لەسەر شێواندنی ڕوئیای تاك و بێئومێدی گشتی و چەواشەكاری و هەڵڕشتنی هەواڵی درۆ و دروستكردنی سەدان ڕووداوی نەخوازراو و بڵاوكردنەوەی ناشرینترین دیاردە و كارەساتەكان و خولقاندنی فەزایەكی مەترسیداری پڕ لە دڵەڕاوكێ دەكات ، چارەكی ئەوە كۆمەڵگا بەئاراستەی دەوڵەتداری یاسايی و خۆشگوزەرانی كۆمەڵایەتی نەبراوە و نەبووەتە ناوەند و سەنتراڵێكی گرنگ بۆ دەستەبەركردنی پاراستنی مافی هەمووان لەناو سیستمێكی دادپەروەرانەدا، كە شایستەی خودی مرۆڤ بێت وەك ئەوەی كە ماركسیزم لە شیكردنەوەی كەپیتالیزمدا ئاماژەی پێدەكات.

وتاری نووسەران


 رێگای كوردستان ماڵپەڕێكی سیاسی، رۆشنبیری، گشتییە ئۆرگانی حزبی شیوعی كوردستانە، مەكتەبی راگەیاندنی ناوەندی بەڕێوەی دەبات

میدیا

   

   تەلەفۆن:   797 4635 750 964+

   ناونیشان:  هەولێر - گەرەکی ئازادی - نزیك نەخۆشخانەی نانەکەلی

   ئیمێل:  regaykurdistan@gmail.com

تابلۆی هەفتە