زۆربەی شرۆڤەکارو چاودێرانی سیاسی، پێشبینی و بۆچونیان وابوو کە لەمانگی ئەیلول ئەمریکاو ئیسرائیل هێرش دەکەنە سەر عێراق و گروپە چەکدارەکان دەکەنە ئامانج و دۆخی ئەمنی عێراق تێکدەچێت و دەبێتە هۆی ئەنجامنەدانی هەڵبژاردن بەڵام بەبێ هیچ هێرش و پەلامارێکی دەرەکی و ئاڵۆزیەکی ناوخۆیی، مانگی ئەیلول تێپەڕی و لە سێیەم ڕۆژی مانگی تشرینی یەکەم بانگەشەی هەڵبژاردن بۆ ئەنجومەنی نوێنەرانی عێراق دەستیپێکردو دوو هەفتە بەسەر بانگەشەدا تێپەڕی.
ئێستا شرۆڤەکاران و چاودێرانی سیاسی پێیان وایە، گۆڕانکاری و ئاڵۆزی لە عێراق کەوتوەتە دوای 11/11، واتا دوای هەڵبژاردنی ئەنجومەنی نوێنەران و ئاشکرابونی ئەنجامی هەڵبژاردنەکان. پێشیان وایە ئەگەر گۆڕانکاری لە سندوقەکانی دەنگدانەوە ئەنجام بدرێت و شیعە دەسەڵاتدارەکانی نزیک لە ئێران لە دەسەڵات دوور بخرێنەوە، ڕەنگە دۆخەکە لە بەرژەوەندی هاووڵاتیانی عێراق بێت و دەنگدەران لەڕێگەی دەنگدانەوە ووڵاتەکەیان لە جەنگ و کاولکاری بەدوور بخەنەوە.
بەڵام بەپێچەوانەوە چیتر ئەمریکا و ئیسرائیل پێیان قبوڵ نیە لایەنەکانی نزیک لە ئێران لە دەسەڵات بمێننەوەو گروپە چەکدارەکانیان بەردەوام بن لەهەڕەشەو مەترسی بۆ سەر ئاسایشی نەتەوەیی ئیسرائیل و بەرژەوەندیەکانی ئەمریکا لە ناوچەکە.لە کاتێکدا ئەمریکاو ئیسرائیل تا ئاستێک هەڕەشەو مەترسیەکانی ئێرانیان لەناوچەکە کەم کردووەتەوەو حەماس و حزبوڵاش بەتەواوی لاوازو لەجوڵە خراون.
بۆیە هێشتا عێراق مەترسیەکانی شەڕو ئاڵۆزی و گەمارۆی ئابوری تێنەپەڕاندووە.
