وه‌زاره‌تی ئابوری فیدراڵی لە ئەڵمانیا له په‌یامێكی نوسراودا كه ئاڕاسته‌ی په‌رله‌مانی وڵاته‌كه‌ی كردووه ڕایگه‌یاند، "ئه‌و بارانه په‌یوه‌ندییان به كه‌ره‌سته‌ی سه‌ربازی دیكه‌وه هه‌یه و چه‌كی جه‌نگی تێدا نییه".
له 8ی (ئاب/8)ی ئه‌مساڵ فریدریش مێرز ڕاوێژكاری ئه‌ڵمانیا فه‌رمانی ڕاگرتنی كاتی هه‌نارده‌كردنی كه‌ره‌سته‌ی سه‌ربازیی ده‌ركرد كه ده‌توانرێت له ململانێی به‌رده‌وامی غه‌ززه‌دا به‌كاربهێنرێت، هه‌نگاوێك وه‌ك گۆڕانكاری له سیاسه‌تی ئه‌ڵمانیا به‌رامبه‌ر به ئیسرائیل دوای په‌ره‌سه‌ندنی ئۆپه‌راسیۆنه سه‌ربازییه‌كانی ئیسرائیل سه‌یر ده‌كرێت.
به‌رلین پێشتر ورده ورده ڕه‌خنه‌كانی له حكومه‌ته‌كه‌ی بنیامین نه‌ته‌نیاهۆ سه‌رۆك وه‌زیرانی ئیسرائیل چڕتر كردبوه‌وه، به‌ڵام خۆی له سه‌پاندنی سزاكان به‌دور گرتبو.
له ماوه‌ی پێنج هه‌فته‌ی یه‌كه‌می ڕاگرتنه‌كه‌دا، هیچ ڕه‌زامه‌ندییه‌كی هه‌نارده‌كردن نه‌درا. ڕه‌زامه‌ندییه‌كانی ئێستا كه ماوه‌ی تا 22ی (ئه‌یلول/9)ی 2025 ده‌گرێته‌وه، ده‌ریده‌خه‌ن كه باركردن به به‌های 2.46 ملیۆن یۆرۆ له نێوان 13 بۆ 22ی (ئه‌یلول/9)دا ڕویداوه.
تا ئێستا سروشتی ئه‌و كاڵا هه‌نارده‌كراوانه ڕون نییه، ئه‌ڵمانیا هه‌شت پۆلی خستۆته‌ڕو كه بریتین له موشه‌ك، تۆرپیدۆ، كه‌شتی جه‌نگی و كه‌ره‌سته‌ی ده‌ریایی، به‌ڵام به‌و پێیه‌ی ئه‌م هه‌نارده‌كردنانه وه‌ك چه‌كی جه‌نگ پۆلێن نه‌كراون و به‌های كۆی گشتییان تاڕاده‌یه‌ك كه‌مه، پێده‌چێت كه‌ره‌سته یان ئامێر بن.
