هیوا عومەر
بەشی دووەم:
ئەو پرسە نوێیانەی لە بەردەم دەرگاماندان
لەم سەردەمە نوێیەدا كۆمەڵێك پرسی تازە هاتوونەتە پێش، ئەم پرسانە جیاوازن لە پرسگەلێكی سەدەكانی ڕابردوو. دروستبوونی ناوەندێكی فراوانی پەراوێزخراوكان، ئەم پەراوێزخراوانە هەموو ئەو كەسانە دەگرێتەوە كە سیستەمی سیاسی و ئابووری بە فۆرمی نیولیبراڵیزم لە ڕەهەندی سیاسی و ئابوورییەوە بۆ ڕۆڵیان لە پرۆسەی سیاسی و بەشدارییەكی مانادار دوورخستووەتەوە. ئەوەش وایكردووە ئەم مۆدێلە لە دیموكراسیی سیاسیی ڕووكەشی، بەبێ دیموكراسیی كۆمەڵایەتی و ئابووری تەواو شكستبهێنێت.
جیاوازییە چینایەتییەكان بەجۆرێك لە هەڵكشاندان، چیتر تەنها پەیوەندیی كار و سەرمایەی ناو كارگەكان هۆكارنین بۆ دروستبوونی ئەو فەزا نایەكسانییە. لەمڕۆدا ژینگەی كاركردن زیاتر و زیاتر ناسەقامگیرتر دەبێت، كرێكارێك، فەرمانبەرێك، كارمەندێكی كۆمپانیا، ناتوانن هیچ دڵنیاییەكی دارایی و دەروونییان هەبێت. لەو لاشەوە كەمینەیەكی هەڵتۆقیو بەشێوەیەكی سەرسوڕهێنەر دەوڵەمەندتر دەبن.
گۆڕانی كەش و هەوا و پیسبوونی مەترسیداری ژینگە، بەردەوامی هەڵكشانی فۆڕمەكانی جیاوازی ڕەگەزی لە نێوان ژن و پیاودا، پرسی تازەن و بەردەرگای گرتووین. ئەمانە پرسی جیهانین كە لەگەڵ خۆیدا بەهۆی تەسلیمبوون بە بازاڕ و گۆڕان لە پەیكەری ڕۆڵی حكومەتەكان و فەزای سیاسی دابڕاو لە فكر، جۆرێكی تایبەت لە گوتاری ڕق و كینە و پۆپۆلیستی و تەنانەت فكری فاشیزمیش بەرهەمدەهێنن.
فەزایەكی گشتی وەها دروستكراوە جۆرێك لە هۆشیاری ساختە و كاردانەوەی بێ فكر لەناو ناوەندێكی فراوانی خودی ئەو پەراوێزخراوانەدا دروستدەكات، لە كاتێكدا خۆیان قوربانیی وێنەگەورەكەی سیستەمی سەرمایەدارین.
لەگەڵ ئەم پرسانەشدا، لە ئاستی ناوەخۆی كوردستاندا، بەهۆی تایبەتمەندی گەشەكردنی كۆمەڵگەكەمان و جۆری بازاڕ و گەشەی سەرمایە و بوونی ئابوورییەكی كرێخۆری یا بەرخۆری (ریعی)، لەلایەكی تر تەواونەكردنی قۆناغی ڕزگاریی نیشتمانی و مانەوە لە دۆخی دواكەوتوویی كلتووری و پرسەكانی پەیوەست بە عەقڵانیەت و گەشەنەكردنی ڕوحی زانست و ژیانی شارستانی، هەموو ئەوانە وامانلێدەكات وردتر دۆخی سایكۆلۆژی و سۆسیۆلۆژیی كۆمەڵگەكە و ئەو بنەمایانەی بوونەتە هۆكاری تایبەتمەندی لە گەشەكردنی بەهای ماددی و بەهای ڕوحی و مەعنەوی، بخوێنینەوە.
بۆ ئەوەی تێبگەین هۆكارەكانی دروستبوونی ئەم واقیعە چییە لە ئاستی جیهانی گشتی و تایبەتیدا، چۆن دەتوانین لەناو ئەو بارودۆخە گۆڕاوەدا ناكۆكییەكان و ئەو هێزانەش بدۆزینەوە، جیاواز لە هێزەكانی پێشوو، هێزی تازەی گۆڕانكاری سیاسی و كۆمەڵایەتین؟
هەنگاوی یەكەم، پێویستمان بە دووركەوتنەوە لە ڕەچەتەی فكری ئامادەكراو هەیە. بۆ ئەوەش بەبێ تێگەیشتن لە بنەماكانی بیركردنەوەی دیالیكتیكانە، ئەو دووركەوتنەوەیە تەنها وەك دروشمێك دەبێت.
لە هەنگاوی دواتردا، بۆ هەریەك لەوانە میكانزم و تەكتیكی سیاسی و ڕێكخستنی ئەولەویەتی كاركردنی تایبەت بەخۆی دەوێت. بەهۆی تایبەتمەندیی خێرای هۆیەكانی گەیاندن و تەكنەلۆژیای تازە، هێزەكانی گۆڕانكاریش بەو خێراییە ناجێگیر و لە گۆڕاندان، هۆكارەكەشی ئەوەیە سەرچاوەكانی زانیاری و چۆنیەتی كارلێككردن لەسەر هۆشی مرۆڤ بەجۆرێك دیزاینكراوە بە كلیكێكی ئەلیكترۆنی هەزاران و ملیۆنان كەس بەئاسانی ئاراستەدەكەن.
ئەگەر تا دوێنی تا ئاستێك فەزایەكی یەكسان و كراوە هەبووبێت بۆ كێبڕكێی نیوان ڕۆژنامەكان و لێكەوتەكانیان لەسەر هۆشیاری و ڕای گشتی، ئەوە ئەمڕۆ لە ڕێگەی تەكنەلۆژیای تازەی ڕاگەیاندن، نەك سەرچاوەی زانیاریمان كۆنتڕۆڵدەكرێت، بەڵكو سەرچاوەی دروستبوونی مەیلی ژیانی كەسی و حەز و ئارەزووەكانیش دەستكاری دەكرێت.
ئەم هەلومەرجە تازەیە لە پەیكەری ژیانی گشتی و تایبەتیدا، ڕێكخستنی ئامانج و میكانزمی كاركردنی تەواو نوێی پێویستە، كە ئاسان نییە بەو خێراییە بتوانین دەست و پەنجەی لەگەڵ نەرمبكەین و كار لەسەر تواناسازیی هێزی مرۆییمان بۆ ژیانێكی دیكە بكەین.
